個標題咁寫只係因為唔想大家睇到個日期以為係呢篇網誌寫嘅嘢係七月十六號發生嘅。

（題外話︰啱啱見到隻曱[zark]，宜家仲心有餘悸…嗚嗚…）

　　今日晏晝同呀媽喺大埔火車站（其實應該改口叫「港鐵站」，但係點都改唔到…）大堂間「euro go go」食Lunch。間嘢貌似好high-class咁。食咗個唔知咩焗通粉、一片蒜蓉包、一個芒果pancake，同埋飲咗碗雜菜湯（應該算係「羅宋湯」掛？）。啲嘢賣相都唔差，但係味道就真太濃喇。

呢間嘢應該以「速食」為賣點（?）

圖中個沙律係我呀媽的。

　　晚黑同呀Long、呀Dick同呀Long個FD（女仔；意料之外嘅出現）去咗昌運間「源汁源味」食飯。俾咗成大疊Menu我睇食乜。點睇…？呀Long就suggest我食咩「雞扒炒大丁」，我廢鬼事諗食乜就叫咗呢個，再嗌咗杯凍（臺式）珍珠奶茶。點知啲嘢嚟到，「嘩！？唔係呀化？」眼見面前呢碟炒垃圾（雞扒炒出前一丁公仔麫【大】），真係有多少後悔。

　　成餐飯，都係喺度聽呀Long喺度廢up，我完全唔知俾咩反應佢好。

　　食完差唔多九點。Long話想去打機，but我帶咗卅五雞出嚟，就食哂卅五雞，所以同佢講冇錢要番屋企。呀Dick都話要番屋企。點知我哋一路傾就傾到富善，就順便叫埋茵出嚟，跟住一傾就係十二點。

【今日小總結：香港（可能淨係大埔）真係冇（乜）嘢好食，又貴。好似今晚咁俾咗卅蚊（杯嘢飲五蚊）食咗碟垃圾落肚。嗚嗚……】