今日（4/7）一日去咗兩次天河城。一次係去恆生櫃員機攞錢，bibi（笑）同小捷陪我去。

　　去完番嚟，見到群上面伯伯問有冇人去天河城，我話啱啱去完。佢叫我去多次，所以夜晚又去過。

　　今晚有貓貓、伯伯、梓樂、Jus、龍仔同我去。首先去咗天河城，貓要買個裝得落佢部Notebook嘅背囊，點知最後買咗個個個望見都話細嘅背囊。樂樂去到見到條好Sharp嘅紅色短褲，忍唔住買咗。

　　行完天河城就去IKEA，樂樂想要換咗屋企啲家私。本來諗住去到IKEA順便喺嗰度嘅IKEA CAFe食埋飯，點知去到超多人，就冇食，行完哂買咗熱狗同汽水食住先。最後仲買咗四排Dark Chocolate（買三送一），俾一排Jus分俾大家食。

^望真啲個包裝，原來係德國造的。先￥8.90一包，仲要買三送一，真係超抵食。
想食嘅問我攞啦～

　　之後搭巴士番石排東，去咗「呀強」食酸菜魚同水煮魚，原來對我嚟講都唔算太辣，只不過係啲魚太多骨＝口＝”。之後盤酸菜魚食得七七八八，用嗰啲湯打邊爐，好正呀！之後原先嗌支可樂飲哂，就嗌咗幾支啤酒飲。

　　飲飽食醉就番宿舍了。

～公告／お知らせ～

　　我諗到咗今時今日都冇乜嘢需要刻意隱瞞，加上覺得下下打blog都要咁樣copy一次，做啲改動整兩個版本，好嘥【粵音曬1 /sai1/】氣，所以索性一篇過。唔係「自己人」嘅，對於文中人物、用語、事件等，甚至對本人有疑問可以問番我。我亦會盡量保護個別人士嘅私隱，唔需要擔心公開嘅網誌文章會對您本人造成不便。最後，歡迎大家於　敝網誌中踴躍留言及發表評論。謝謝！